Berriak
Ekonomi Gerizan bilduma honetako hemeretzigarren edizioak "Krisia eta agente ekonomikoak: mugitzen ari den mundu-markoa" darama izenburu orokor moduan. Duela ia urtebete, edizio hau prestatzen hasi ginenean, nekez imajina genezakeen aipatutako epealdi horretan bizi izan diren gorabehera eta gertakizun mordoa. Baina, edozein modutan izanda ere, garai hartan egindako analisiak, eta horren gainean hartu zen aurtengo edizio honen edukiari buruzko erabakia, baliagarria izaten jarraitzen du, eta ez hori bakarrik, aipatu gertakizun eta gorabeherek berretsi besterik ez baitute egin.
Edizio honetako izenburuak gaur egun bizi dugun pertzepzioa laburbildu nahi luke nolabait, alegia lurralde-eremu eta erakunde nahiz instituzio desberdinetatik datozen era guztietako osagai ekonomikoen eta finantzarioen funtsezko aldaketak, aldi berean, batera bizi dituen ingurune batean aurkitzen garela. Ez alferrik, maila ekonomikoari dagokionez jendea Errezesio Nagusiaz hitz egiten hasia da honezkero, inolako aho-bizarrik gabe; alderdi finantzarioan, bestalde, gure harridurarako, koiuntura konplikatu batean aurkitzen garela dakusagu, bertan arrisku subiranoak, banku-sistema eta kapitalen merkatuak nahasian mugitzen direlarik; eta alderdi instituzionaletik, egoera orokorra bere eremu eta esparru guztietan onerako kudeatzeko gai izango den lidergo irmo eta sendo baten hutsunea nabarmentzen da argi eta garbi.
Zorpetutako kontsumitzaileen proportzioa (% 29,7) % 35eko atalasetik behera jaitsi da 2011n, aurreneko aldiz hainbat urtetan, eta horrekin euskal etxeetatik herenak ere ez dauka maileguren bat indarrean. Lau euskal kontsumitzailetatik bat (% 25,2 zehazkiago esateko), hipoteka-kreditu baten titularra da, azken hiru urteotan izandako batez bestekoa baino bost puntu portzentual baxuagoa den proportzioa, hain zuzen ere. Eta beste mailegu-mota batzuen titularren proportzioa (% 7,4koa) ia bere horretan mantentzen dela esan genezake, aurreko bi urteetako zifrekin alderatuz gero.
Euskal kontsumitzaileen konfiantza-indizeak balioa errepikatu egin du (74) 2011ko laugarren hiruhilekoan eta aurreko hiruhilekoetan izandako balorazio positiboagoetatik aski urrun sendotzen da. Indizearen balioa 2008 eta 2009ko hirugarren hiruhilekoen artean lortutakoaren antzekoa da; baina, hura ez bezala, emaitza lauagoetan oinarritzen da eta horrela binaka alderatuz gero, lau indizeak elkarrengandik hurbilago daude eta, beraz, ez dago kontsumitzaileek ikuspegi baikor edo optimista erakusten duten alderdi bakar bat ere.
Europako karbonoaren prezioak azken 32 hiletako mailarik baxuenean kotizatu du. 2009ko otsailaren 24raino egin beharko genuke atzera aurten erregistratuta daramagun minimoa baino txikiagoa litzatekeen kotizaziorik topatzeko. Karbonoaren prezioak beheranzko inflexioa izan du 2011ko ekainetik aurrera, eta itxura guztien arabera joera hori sendotu eta egonkortu egingo da datozen hiletan.
