Txostena
LANKIDETZAKO BESTE HITZARMEN BATZUK
Inbertsioari Laguntza Finantzarioak emateko Programak garatzeko Hitzarmena
Beste erakunde batzuen artean BBKren, Kutxaren eta Caja Vital Kutxaren lankidetza duen Hitzarmen honek, AFIen izapidetze elektronikoaren hobekuntza ekarri zuen eta indarrean jarraitu du 2009ko ekitaldian ere.
Gazte Txartela programa
2007ko otsailaren 21eko aginduak Gazte Txartela banatzen duten erakundeen atxikipen-erregimena ezartzen du 2007-2010 epealdirako, eta bost erakunde finantzarioren lankidetza dauka, hiru euskal Aurrezki Kutxena horien artean. Xede populazioa zabaldu egin zen 2009an zehar, 14 urtetik 29ra bitarteko gazteentzat jarriz gaur egun erabilera, orain arte muga 25 urtetan jarria baitzegoen.
Erakunde banatzaileek onartutako konpromisoen artean ondorengoak aipa daitezke: behar adina informazio ematea, gazteek eman beharreko tasa publikoaren erakunde gordailuzain moduan jokatzea, txartelen euskarriak egitea eta Gazte Txartelak banatzea, beste hainbat eginkizunen artean, txartelen titularrei istripu-aseguru bat eskaintzeaz gainera.
Etxebizitzaren Euskal Zerbitzua, Etxebide
Etxebide da Sustapen Publikoko Etxebizitzak esleitzeko Euskal Zerbitzua, eta horrez gain, baita Etxebizitzaren Euskal Zerbitzu Publikoaren barruan osatutako sarea eratzen duten erakundeetako bat, Bizilagun-ekin — etxebizitzara jarritako sozietate publikoekin—, Udaletako etxebizitza-zerbitzuekin eta Eusko Jaurlaritzako Etxebizitza, Herri Lan eta Garraio Sailarekin berarekin batera.
Etxebidek hainbat aldaketa izan ditu bere funtzionamenduan 1997. urtean martxan jarri zenetik, eta horrela 2001ean eskaerak aurkezteko zerbitzu ireki iraunkorra bihurtu zen. Hain zuzen ere, 2009ko urte-amaieran 92.000 eskaeratik gora aurkeztu ziren (% 15,2 Araban; % 50,2 Bizkaian eta % 34,6 Gipuzkoan). Euskal Aurrezki Kutxak Etxebide-ren hasierako unetik beretik izan dira lankide bertan, interesatuei aholkularitza eskainiz eta eskaeren izapidetze-prozesuan laguntza emanez.
Konekta Zaitez Gunea
Eusko Jaurlaritzak 2001ean jarri zuen martxan zerbitzu hau eten digitala gutxitzeko asmoarekin, edonork doan erabiltzeko moduan prestatuak dauden bere bulego-sare zabalean euskal hiritarrei trebakuntza eskainiz.
Zerbitzua Euskadi Informazioaren Gizartean izeneko Egitasmoaren barruan sartzen da, eta bere hasierako helburuak bete ahala eboluzionatuz joan da pixkanaka. Zerbitzua osatzen duten zentro publikoen sarea Eusko Jaurlaritzako Informazio eta Telekomunikazioetako Zuzendaritzara atxikia dago, eta Eudelen laguntza izan du hasieratik bertatik.
2009. urtearen amaieran KZ Gunea sareak 315.000 erabiltzaile erregistratu baino gehiago zeuzkan, eta horietatik, 120.000tik gora aurreneko aldiz trebatu dira Internet-en erabileran. Guztira trebatutako herritarrak 250.000 dira gaur egun.
Euskal Aurrezki Kutxek zerbitzua abian jarri zenetik aritu dira euren lankidetza eskaintzen, banku elektronikoari buruzko ikastaroak emanez. 3.014 ikastaro eman dira, eta 20.232 izan dira bertara etorritakoak.
Kultura Bonuen programa
Euskal Administrazioak kultura-sektoreari laguntza ematea erabaki zuen 2009ko ekitaldian, produktu kulturalen erosketa subentzionatuz hainbat euskarritan, “Kultura Bonuak” izenekoen salmenta bidez. Eta horretarako 76.666 bonu jarri ziren guztira jendearen eskura EAEn, hiru euskal Aurrezki Kutxen bitartez; horrela, BBK-k, Kutxak eta Caja Vital Kutxak zerbitzu anitzeko beren kutxazainen sareak, eta/edo beste bitarteko espezifiko batzuk erabili zituzten.
Bonu bakoitzaren kostua 40 €-koa zen, horietatik 25 € erosleak ordaintzen zituen, eta gainerakoa euskal Administrazioaren diru-laguntzari zegokion.
Hiru Lurraldeen artean 55.625 bonu saldu dira guztira, jendearen eskura jarritakoen % 73 gutxi gorabehera, abenduaren erdialdera hasi eta hiru bat asteko iraupena izan duen kanpaina batean.
Euskara sustatzeko Hitzarmena
2009. urtean ere indarrean jarraitu du euskararen sustapenerako sinatutako Hitzarmenak, Eusko Jaurlaritzaren Lan-Hitz programaren barruan sartzen denak.
Kalitateko kudeaketaren eta zerbitzuaren hobekuntzaren esparruan, euskal Aurrezki Kutxek bezeroei arreta emateko euren zerbitzuan euskara hobekuntzako osagai moduan balioesteko eta beraz bere produktuak eta zerbitzuak ele bitan eskaintzeko konpromisoa hartzen dute, erabiltzaile bakoitzak Kutxarekiko dituen harremanetan bi hizkuntzetako bat aukeratzeko modua izan dezan.
